SIYAASIGA RIYADAYDA

Markaan dareemo oo dhugto in musharixiinta sharaxani aaney micno weyn sameyneyn haddey helaan madaxnimadda, oo aaney soo kordhinayn isbadel badan ayaan isweydiiyey waa qof noocee ah siyaasiga riyadaadu ee markuu dalka qabsado ay niyadu kuu dagi lahayd? dabadeed waxa ii sawirma siyaasiga aan rabo, waana kan:-

Siyaasiga riyadayda: Dadkaygaw salaamacallaykum, waxa qalbigayga ku jira iyo wuxuu afkaygu odhan karaa wey kala badan yihiin, laakiin ugu yaraan wey is waafaqsan yihiin.Qalbigayga waxa ku jira ee fiicnaan lahayd inaan ereyo micno badan sameeya aan ku sharraxo aad bey ubadan yihiin.Laakiin ugu horreyn waan idin jecelahay, jaceyl aan idiin qabo aawadeed ayaan idinku fikiraa, idinkoo ogeyn (Alla i arkee) .

qofbaad aragteen qof jecel oo qof kaliya jaceylkiisa la diran oo la ildaran, ka warran qofka dad ka dad ka badan 5 milyan oo meelo kale duwan ku nool jecel oo jaceylku udirey laakiin aan garaneyn siduu wax ugu qaban lahaa. waxaan ka qiiroodaa markaan arko kumanaan hooyooyin ah oo suuqa xabuub ku iibinaya oo caruurtoodiina cid utarbiyadaysa aan heysan, oo yagoo dhiban haddana wiilkeedii noqday ka dadka moobiladda ka qaada, markuu waayey cid tarbiyadaysa. Inanteedii noqotay ta suuqa meereysanaysa markay weyday cid ilaalisa oo tarbiyadaysa,hadhawna noqon doonta hooyadda caruur aan anshax fiicneyn.Waxaaba waxa igaga darran caruurtaanu ku daalno ee nidhaahno iskuulbaynu geyney ee macalinku aanu kalaaskaba kasoo xaadirin, ama intuu wax yar uxariiqo, inta kalena usheekeeyo, waxa kasii murugo badan marka jaamacaddu noqoto meel 4 slide lagu dhigo, oo ardaygii wax dheeraad ah is yidhaa macalinka weydiina loogu jawaabo adigu intaasuun akhri, intaasaa imtixaanka lagu soo qaadayaaye.Waa ardey xiisad walba kabo ka dhigatay, wax ay gaar uyaqaanaa aaney jirin. Waa sida qof lagu yidhi cunto karin baan ku barayaa, oo markii kijadii la galiyey loo dhigay waa maxay basashu, oo isagii oo aan garanayn waxay basashu tahay, bariiska haddana lagu boodey, haddana qajiga, hadana xabuubta ......Markii danbana isagoon waxba karin kareyn lagu yidhi waad dhameysay.Bal haduuu dhameeyey muu wuxuun kariyo yacnii muu wuxuun sameeyo ka mid ah wuxuu bartey?......Mooyi?

Waxa jira dhibaatooyin badan oo dhinac walba ah, gidaar kasta oo nolosheena ka mid ah boqolaal jaajuur baa ka maqan. Lama yaabani in dhibaatooyin farabadani jiraan laakiin waxaan layaabaa inaaney jirin cid dhibaatooyinkaa xalisa. Anigu iskumaan soo sharraxin in magac doon aan ahay ama lacagba laakiin markaan dareemay masuuliyadda 5 milyan ee dalka ku noolba, ka fakarista waayahooda nololeed waxaan u arkay sida kaliya ee aan dadkayga aan jecelahay noloshooda ubadelli karaa iney tahay inaan isa soo sharraxo oo aan helo fursad aan dadkayga ugu carbin karro iney buuxiyaan boqolaalkaa jaajuur ee gidaarka kasta oo nolosheena ah ka dhiman. Anigu ma jecli lacagta dalka laakiin waxaan jecelahay lacagta dalka inay noqoto dubbe lagu dhiso giidaar kastoo inaga daloola.Shakhsiyan alaabta binu aadam sameega ahi ima farxad galiso sida guri. gaadhi iyo passport iyo waxyaabahaas.Aniga waxa ifarxad galiya dadka, waxaanan aaminsanahay waxa layidhaahdo "Human Resource" yacnii haddii dadka juhdi badan la galiyo oo waxbarashadooda iyo akhlaaqdooda la dhiso in wax kastoo binu aadamka kale ee dunidda ku nooli sameeyey wax udhigma inaynu sameyn karno.Anigu waxaan jecelahay dadka, dadkaa ifarxad galiya, dadkaan ka helaa dhiirigalin iyo jaceyl, yagaanan udaalayaa doonayaana inaan ka dhigo qaar mustaqbal fiican leh. dakan aan jecelahay waa idinka, idinkuna waxaad kartaan in codkiina aad ku badeshaan mustaqbalka ubadkiina, in wax barashadda ubadkiinu aaney noqon wax maaweelo ah oo aan nolosha lagu dhaqan galin ee ay noqoto wax qofka wax bartay iyo ka kale isbadel weyn udhaxeeyo, wax qofkii jaamacad dhameeyey aanu noqon qof aan maareyn karin noloshiisa,.Waxaan ku riyooda ineynu ka tagno dunidda sadexaad oo noqono dunidda labaad, yacnii dhaqaalaheenu ka kobco wadamadda faqiir ka ah oo ukobco wadamadda dhexdhexaad ka ah ila rumeeya riyadaas, ila dareema dhibkiinu inuu anigana dusha iga saaran yahay, in barwaaqo soorankiinu farxadayda tahay.

Ma yihi Lacag doon, Dadku lacagta waxay ujecel yihiin si ay alaab ugu soo iibsadaan, alaabtaas oo ah guri weyn ama gaadhi qaaliya si ay utusaan dadka iney khatar yihiin, ama lacag heystaan, intaasna farxad bay ka helaan.Anigu waxay farxadaydu ku jirtaa idinka, micno weyn iima sameyso hadaan sariir ku seexdo iyo hadaan caw ku seexdo, micno weyn iima sameyso inaan maro qaaliya xidho iyo inaan huudheydh Sh 5000 xidho.Laakiin waxa micno iisameysa in caruurta barito yidhaahdaan madaxweynihii hore intaanu dalka qabsan ardayda jaamacaddu 4 slide bey dhigan jireen, waddanku faqiir buu ahaa, tahriibtu wax caado ah aan laga diirsan buu ahaa, dalkuna wax soosaar muu lahayn. Imminka waddankeena iskuulo technology ah oo aad ucasriyaa ka furran, wadamadda waxbarashadda ugu fiicanbaynu ku jirnaa, dhaqaalaheenu 1000% kor ukacay, Alle khayr hasiiyo madaxweynaheenii hore, janadda ha galiyo, intaas oo ducaa inaan helo farxad iigu filan dunida, inaan arko dadkoo mustaqbalkoodu ka fican yahay sidii horana farxad iyo deganaansho an lacagta laga helin iigu filan.

Mahadsanid dhamaantiin.

Waa noocee siyaasiga riyadaadu.